സുവർണ്ണ ജൂബിലി നിറവിൽ നിൽക്കുന്ന നമ്മുടെ സംഘത്തിന്‍റെ പിന്നിട്ട വഴികളിലേക് നോക്കുമ്പോൾ , 1964-ൽ രൂപീകൃതമായ നമ്മുടെ സംഘം ആരംഭഘട്ടത്തിൽ പല ബുദ്ധിമുട്ടുകളും തരണം ചെയ്യേണ്ടി വന്നെങ്കിലും, അർപ്പണബോധത്തോടെയുള്ള മുൻകാല പ്രവർത്തകരുടെയും ജീവനക്കാരുടെയും കൂട്ടായ പ്രവർത്തനം മൂലം ഇന്ന് ക്ലാസ് 1 സ്പെഷ്യൽ ഗ്രേഡ് പദവിയിൽ പ്രവർത്തിക്കുന്ന ജില്ലയിലെത്തന്നെ മികവുറ്റ ഒരു സഹകരണ സ്ഥാപനമാണ്. വളർച്ചയുടെ പടവുകൾ അതിവേഗം പിന്നിട്ട നമ്മുടെ സംഘം ആദ്യകാലങ്ങളിൽ 1000 രൂപയാണ് ലോൺ നൽകിയിരുന്നത്. അത് ഇപ്പോൾ 25 ലക്ഷത്തിൽ എത്തി നിൽക്കുന്നു. പ്രവർത്തനങ്ങളുടെ ആദ്യ ഘട്ടങ്ങളിൽ ജില്ലാ സഹകരണ ബാങ്ക് ലോൺ വഴിയും ഓവർ ഡ്രാഫ്റ്റ് വഴിയുമാണ് അംഗങ്ങൾക് വായ്പ കൊടുത്തിരുന്നത്. എന്നാൽ ഇപ്പോൾ തനത് ഫണ്ട് ഉപയോഗപ്പെടുത്തിയാണ് സംഘം മുന്നോട്ടു പോയിക്കൊണ്ടിരിക്കുന്നത്. ഒരംഗത്തിനെ പരമാവധി 25 ലക്ഷം രൂപ വരെ ലോൺ കൊടുക്കുന്നു.

അംഗങ്ങളുടെ സാമ്പത്തികാവശ്യങ്ങൾ നിറവേറ്റുന്നതിനോടൊപ്പം അംഗങ്ങൾക്കുണ്ടാകുന്ന അപകടങ്ങൾക്ക് അടിയന്തര മെഡിക്കൽ സഹായമായി 50, 000/- രൂപ വരെയും പലിശ രഹിതമായി വായ്പ്പ നൽകുന്നു. അതുപോലെതന്നെ മാരകമായ രോഗം ബാധിച്ച ചികിത്സയിൽ കഴിയുന്ന അംഗങ്ങൾക്ക് ഒരു കൈത്താങ്ങായി 25, 000/- രൂപ വരെയും സഹായധനമായി നൽകി വരുന്നു. പഠനരംഗത്ത് ഉന്നതവിജയം കരസ്ഥമാക്കിയ വിദ്യാർത്ഥികൾക്ക് അവാർഡുകൾ നൽകുകയും പത്താം ക്ലാസ്സ്‌ മുതൽ ഡിഗ്രി, പ്രൊഫഷണൽ കോഴ്സുകൾ, കലാകായിക രംഗങ്ങളിൽ മികവ്തെളിയിച്ച പ്രതിഭകൾ എന്നിവർക്ക് പ്രോത്സാഹനം നല്കികൊണ്ടിരിക്കുന്നു.

സംഘത്തിൽ നിന്നും ലോൺ എടുക്കുന്നവർക്കും ജാമ്യം നിൽക്കുന്നവർക്കും സുരക്ഷിതത്വം ഉറപ്പാക്കുന്നതിനു വേണ്ടിയാണ് ഡെത്ത് കം റെട്ടർമെൻറ് ബെനെഫിറ്റ് ഫണ്ട്‌ നടപ്പിലാക്കിയിട്ടുള്ളത്. അതുപ്രകാരം ലോൺ എടുക്കുന്നയാൾ മരണപെടുകയാണെങ്കിൽ അദ്ദേഹത്തിന്റെ മുഴുവൻ ലോൺ തുകയും ഈ സ്‌കീമിൽ പെടുത്തി എഴുതിത്തള്ളുന്നു.

കേരള സ്റ്റേറ്റ് ഇലട്രിസിറ്റി ബോർഡ് എംപ്ലോയിസ് കോ-ഓപ്പറേറ്റീവ് സൊസൈറ്റി എറണാകുളം ജില്ലയിലെ വൈദ്യുതി ജീവനക്കാരുടെ ഏക ധനകാര്യ സ്ഥാപനമാണ്. 1964-ൽ ഭക്ഷ്യക്ഷാമകാലത്തു അന്നത്തെ തൊഴിലാളി നേതാക്കളായിരുന്നവരുടെ നേതൃത്വത്തിൽ ജീവനക്കാർക്കും മറ്റും ഭക്ഷ്യവസ്തുക്കൾ സംഭരിച്ചു വിതരണം ചെയ്യുക എന്ന ലക്ഷ്യത്തോടെ 13-10-1964-ൽ രജിസ്റ്റർ ചെയ്യപ്പെട്ട സഹകരണ സംഘം ആണ് ക്രമേണ ജില്ലയിലെ വൈദ്യുതി ജീവക്കാരുടെ സർവ്വതോമുഖമായ ആവശ്യങ്ങൾ നിറവേറ്റുന്നതിന് പര്യാപ്‌തമായ ഒരു പ്രസ്ഥനമായി വളർന്നത്. ശ്രീ എം. മാത്തൻ സർ ആയിരുന്നു അന്നത്തെ പ്രസിഡന്റ്. തുടക്കത്തിൽ 76 അംഗങ്ങളും 760/- രൂപ ഓഹരി മൂലധനവുമാണ് ഉണ്ടായിരുന്നത്. അതിനുശേഷം 1965-ൽ ശ്രീ എം. പി അയ്യപ്പൻ പ്രസിഡന്റ് ആയി സ്ഥാനമേറ്റു. അദ്ദേഹത്തിന്റെ ആകസ്‌മികമായ നിര്യാണം മൂലം സംഘത്തിന്റെ പ്രവർത്തനം സ്തംഭനാവസ്ഥയിലായി. നേതൃസ്ഥാനത് ആരുമില്ലാതായി. അന്നത്തെ ഇലക്ട്രിസിറ്റി ജീവക്കാരായിരുന്നു ശ്രീ ടി. എം ഇബ്രാഹിം പലയിടത്തായി ചിതറിക്കിടന്ന അതിന്റെയ് പുസ്തകങ്ങളും രേഖകളും ചെറിയ അലമാരയിലാക്കി പൂട്ടി സൂക്ഷിച്ചു. ഈ രേഖകളാണ് സംഘത്തിന്റെ പുനരുജീവനത്തിനും മറ്റും സഹായകരമായത്. ശ്രീ വി. വി ദാസൻ , ഐപ്പ് വർഗീസ് , പി. ജെ മാത്യു , ടി. എ ഇബ്രാഹിം , കെ. എൽ അഗസ്റ്റിൻ , കെ. എസ് ജോർജ് എന്നിവർ പുനരുജീവനത്തിനു നേതൃത്വം നൽകി. സഹകരണ വകുപ്പിന്റെയും ജില്ലാ സഹകരണ ബാങ്കിന്റെ സഹായത്തോടെ ക്രമേണെ സംഘം ജീവൻ വച്ചു . ശ്രീ വി. വി ദാസൻ പുനരുജീവനത്തിനു ശേഷം ആദ്യത്തെ പ്രെസിഡന്റ് ആയി.

ക്രമേണെ പ്രവർത്തനമികവ് ഏല്ലാ മേഖലകളിലും പ്രത്യക്ഷീഭവിച്ചു . സഹകരണ ഡിപ്പാർട്മെന്റിലും ജില്ല സഹകരണ ബാങ്കിലും നല്ല മതിപ്പ് ഉളവാക്കാൻ നമുക്ക് കഴിഞ്ഞു . ബാങ്കിൽ വായ്പ്പ അപേക്ഷ സമർപ്പിച്ചാൽ ഒട്ടും താമസിയാതെ അനുവദിച്ചു തരുവാൻ യാതൊരു മടിയും കാണിച്ചിരുന്നില്ല . തുടർച്ചയായി ലാഭത്തിൽ പ്രവർത്തിക്കുകയും ഡിവിഡന്റ് കൊടുക്കുകയും ചെയ്യുന്ന സ്ഥാപനമായി . ഓഡിറ്റ് റിപ്പോർട്ടും ഇൻസ്‌പെക്ഷൻ റിപ്പോർട്ടുമൊക്കെ സംഘത്തിന്റെ മികവ് വിളിച്ചറിയിക്കുന്നതായി . വർഷങ്ങളായി അത് നിലനിർത്തിപ്പോരുന്നു . ഡത്ത്‌ കം റിട്ടയർ ബെനിഫിറ്റ് ഫണ്ടും , റിസ്ക് ഫണ്ടും ആരംഭിച്ചത് അംഗങ്ങൾക്ക് വളരെ ആശ്വാസമായി .

വളർച്ച തുടർന്നുകൊണ്ടേയിരുന്നു . 76 അംഗങ്ങളും 760 രൂപ ഓഹരി മൂലധനവുമായി തുടങ്ങിയ സംഘത്തിൽ ഇപ്പോൾ 4500 അംഗങ്ങൾ ഉണ്ട് . നിക്ഷേപം 36 കോടിയും ഓഹരി മൂലധനം 2 കോടി രൂപയും------------- ആയി ഉയർന്നിരിക്കുന്നു . വായ്‌പ്പാ ബാക്കി നിൽപ്പ് തുക 33 കോടി രൂപയുമാണ് . സാധാരണ വായ്പ്പതുക 10 ലക്ഷം രൂപയും എമർജൻസി വായ്പ്പതുക 50,000/- രൂപയും കൂടാതെ ഫെസ്റ്റിവൽ ലോണും ചികിത്സ ലോണും കൊടുത്തുവരുന്നു . സംഘം പൂർണമായും കമ്പ്യുട്ടർവൽക്കരിക്കുന്നതിനും കഴിഞ്ഞു . ക്ലാസ് 1 സ്പെഷ്യൽ ഗ്രേഡിൽ പ്രവർത്തിക്കുന്ന ജില്ലയിലെ തന്നെ ഒരു ധനകാര്യസ്ഥാപനമായി നമ്മുടെ സഹകരണ സംഘം വളർന്നിരിക്കുന്നു എന്നതിൽ നമുക്ക് എല്ലാവര്ക്കും അഭിമാനിക്കാം . സർവ്വശ്രീ വി . ആർ അയ്യപ്പൻ നായർ , പി . കെ ഗോപാലകൃഷ്ണൻ , എം . ജി അഗസ്റ്റിൻ , എ. ജി ജോയ് , എസ് ബാബുക്കുട്ടി , വി ജേക്കബ് ലാസർ , കെ ശശി , കെ . വി വാസുദേവൻ , കെ. സി മണി , പി. എസ് വിനോദ് എന്നിവർ പ്രസിഡന്റുമാരായി ഭരണനേതൃത്വം വഹിച്ചവരാണ് .

ആദ്യം എമർജൻസി ലോൺ ആയി 100 രൂപയാണ് കൊടുത്തിരുന്നത്. അന്നു സാധാരണ വായ്പ്പ പരമാവധി 1000/- രൂപയായിരുന്നു എറണാകുളം ജില്ലാ ബാങ്കിൽ നിന്നു വായ്പ്പ എടുത്തിട്ടാണ് നൽകിയിരുന്നത്. വായ്പ്പ അപേക്ഷ ബാങ്കിൽ സമർപ്പിച്ചു കഴിഞ്ഞാൽ ഒരാഴ്ച കഴിയുമ്പോൾ ബാങ്ക് ഇൻസ്‌പെക്ടർ പരിശോധനയ്ക്കായി എത്തും. ബാങ്ക് ഇൻസ്‌പെക്ടർ വളരെ വിശദമായ പരിശോധനയാണ് അന്നു നടത്തിയിരുന്നത് . ബാങ്കിൽ നിന്നു വായ്പ്പ അനുവദിച്ചു കിട്ടുന്ന ദിവസം പ്രസിഡന്റ് ഉൾപ്പെടെ മൂന്ന് ഭരണസമിതി അംഗങ്ങൾ ജില്ലാ ബാങ്കിൽ നേരിട്ട് പോയി വായ്പ്പതുക സൊസൈറ്റി അക്കൗണ്ടിലേക്കു ക്രെഡിറ്റ് ചെയ്യണം . അതിനുശേഷം അവർ തിരികെ വന്നിട്ടു വേണം വായ്പ വിതരണം നടത്തുവാൻ .

അധികം വൈകാതെ എമർജൻസി വായ്പാതുക 200/- രൂപയായും സാധാരണ വായ്പ്പതുക 2000/- രൂപയായും ഉയർത്തി . ശ്രീ. ശിവപ്രസാദും ശ്രീ. നാസറും ജീവനക്കാരായി എത്തിയതോടെ പ്രവർത്തനങ്ങൾ കൂടുതൽ ഊർജ്ജസ്വലമാക്കാൻ കഴിഞ്ഞു. താമസിയാതെ തന്നെ ശ്രീ. ഇ. ഡി. തമ്പിയും, കുറച്ചു വർഷങ്ങൾക്കുശേഷം ശ്രീ. കെ. ജി. മുരളീധരനും പിന്നിട് ശ്രീമതി എ. എസ്. ഷീലയും സംഘത്തിൽ നിയമിതരായി. തുടർന്ന് ശ്രീമതി V H ഷബിത, E V ഷീബ, ശ്രീ എസ് രാജീവ് എന്നിവരും സംഘത്തിൽ ജീവനക്കാരായി എല്ലാകാലത്തും ഭരണസമിതിയുടെയും ജീവനക്കാരുടെയും കൂട്ടായ പ്രവർത്തനമാണ് സംഘത്തിന്റെ വളർച്ചക്ക് കരണമായിട്ടുള്ളത്

ആദ്യകാലങ്ങളിൽ ഭരണസമിതിയിലേക്കുള്ള തിരഞ്ഞെടുപ്പ് തികച്ചും സൗഹൃദപരമായാണ് നടന്നിരുന്നത് തെരഞ്ഞെടുപ്പെന്ന പ്രക്രിയ നടത്തുകപോലും ചെയ്യേണ്ടി വന്നിട്ടില്ല. ആവശ്യമുള്ള അംഗങ്ങളുടെ പേര് നിർദേശിക്കുകയുമാണ് ചെയ്തിരുന്നത് വാർഷിക പൊതുയോഗങ്ങൾ പ്രവൃത്തി ദിവസങ്ങളിലെ വൈകുന്നേരങ്ങളിലാണ് നടത്തിയിരുന്നത് . വായ്പാതുക കാലാകാലങ്ങളായി 10, 000/-, 25, 000/-, 50, 0000/- , 1, 00, 000/- എന്നി ക്രമത്തിൽ ഉയർത്തികൊണ്ടിരുന്നു

ആദ്യകാലങ്ങളിൽ സംഘത്തിനു നിക്ഷേപമായി ആകെ ഉണ്ടായിരുന്നത് വായ്പാ കൊടുക്കുമ്പോൾ നിർബന്ധ നിക്ഷേപമായി പിടിക്കുന്ന ചെറിയ ഒരു തുക മാത്രമാണ്. എല്ലാ വായ്പ്പകൾക്കും ജില്ലാ ബാങ്കിന്റെ സഹകരണമാണ് ഉണ്ടായിരുന്നത്. അന്നൊക്കെ വർഷത്തിലെ നിശ്ചിത കാലയളവിൽ സംസ്ഥാന സർക്കാർ നിക്ഷേപ സമാഹരണ മാസമായി നിശ്ചിയിക്കുമായിരുന്നു. എന്നാൽ എംപ്ലോയീസ് സംഘങ്ങൾക്കു ആ ഇനത്തിൽ ഒരു ടാർഗറ്റ് ഉണ്ടായിരുന്നില്ല എന്നാൽ അന്നു നാം നിക്ഷേപ സമാഹരണത്തിനായി ഒരു ടാർജെറ്റ് സ്വയം നിശ്ചയിക്കുകയും നിക്ഷേപസമാഹരണം നത്തുകയും ചെയ്തു. കൂടുതൽ കൂടുതൽ ചിട്ടികൾ ആരംഭിച്ചതോടെ ആംഗങ്ങളിലെ സമ്പാദ്യശീലം വളർത്തുന്നതിനും കൂടുതൽ അംഗങ്ങളെ സംഘത്തിലേക്ക് ആകർഷിക്കുന്നതിനും കഴിഞ്ഞു. നിക്ഷേപവും വായ്പ്പതുകയും വർദ്ധിച്ചുകൊണ്ടിരിക്കുന്നു.

1994-ൽ ആണ് സംഘം ഇന്നു പ്രവർത്തിക്കുന്ന കെട്ടിടത്തിലേക് മാറിയത്. അതുവരെ പവർഹൗസ് ഇലെക്ട്രിക്കൽ സെക്ഷനായി പ്രവർത്തിച്ചിരുന്ന അത് കലൂർ സെക്ഷനായി കലൂരിലെക്ക് മാറ്റിയത് പ്രകാരം ഇലെക്ട്രിസിറ്റി ബോർഡിന്റെ അനുമതിയോടെ സൊസൈറ്റി അവിടെ പ്രവർത്തിച്ചു തുടങ്ങി. ഭരണസമിതിയുടെ നിരന്തരമായ ശ്രമഫലമായാണ് അത് നമുക്ക് അനുവദിച്ചു കിട്ടിയത്